نوشته شده توسط : مهدی پور

 

یَه عمرَ آدمی تی پا بَنیشتم

غمه، می زیندگی اَمره بَریشتم

پیرابوم، بَس نیه چشم انتظاری

بَلیتم، نیمه جانابوم، بَبیشتم

 ( ناصر فرهادیان )


چَقَد تلخه غریبی در ولایت

غمام دئنه می دستَ جی شکایت

بیئن مردم، می دور و بر جمابین

شنیدن دونه خیلی می حکایت

( خویشتن دار لنگرودی )

بَشوی عمری، بَبوم واخوب مو کم کم

تموم عمر مو ایسّه همش غم

عجب بختی امو دَئشتیم خداجون

یه روزَ روزیگارَن مِه نَبو چَم!

 ( داوود خانی خلیفه محله )

می تسکه دیل غریبی مئن بَگود گیر

نَگیته خاشخا آخر می سَرویر

غم دوری جی هر جا با بَئنَم مو

غریبی تیر بومَه می قلبَ سر جیر

 ( داوود خانی خلیفه محله )

گوتَم دامون بَشیم، دامون نومِه تو

گوتم لاجون بَشیم، لاجون نومه تو

ندونَسم تو اَندی کس مَسازی

که هر جایی گوتم، آسون نومه تو

 ( داوود خانی خلیفه محله )

بیه بانو، بیه می جونَ بانو!

سراجیرابو می چوشمانَ اَرسو

نه روز آروم دَئنم، نه شؤ قراری

بَبوم از غوصه ی دونیا  ژَگَر چو

( داوود خانی خلیفه محله )

روخونه لب ستاره زئنه سوسو

ندونم تسکه دیل چی خئنه از مو

در ای دونیا سلیم هم یار دئنه

الاتی تی بگو آخه می یار کو؟

( حسنعلی محمودی )

اَمه را گرچه از همدیگه دوره

به تی دوری می دیل خیلی صبوره

بشوم خَ دورابوم از شهر لاجون

قدیمئن بد نوتن که دور " نوره "

 ( حسین وثوقی )

اَمِه مئن تووادان هَندِه جدایی

کورا بَشوّ اَمِه او آشنایی!

یه روز هنده رَسَنه که دوباره

بَبیم همدیگره واسِه فدایی؟

( حسین وثوقی )

وختی خوسنم، تره اینم خواب میان

بیداربونم، چوشمَ اینم آبَ میان

نه خواب دئنم تی واسه نه بیداری

حیرانمه آخه ماه و آفتاب میان

 ( سید علی میر باذل )

تی دوری، دُکشانه می چوشمَ سویه

تی غم زرداگودای، می رنگ و رویه

ولی با این همه درد و شکایت

تی اَمرا بون، همش می آرزویه

 ( محمد دعایی )

جمع آوری و تنظیم : مهدی پور (وبلاگ نصیرمحله)




:: برچسب‌ها: دوبیتی های گیلکی
تاریخ انتشار : ۱۳٩٠/۸/٢٠ | نظرات ()
 
   
خدایا اگر ندانستم از تو چه بخواهم و از درخواست خودم حیران بودم ؛ تو مرا به آن چه صلاحم هست رهنمون باش.و دلم را بدانچه رستگاری من در آن هست؛متوجه فرماکه چنین کاری از توشگفت آور نیست و از کفایت های توناساخته نمی باشد.